ភ្នំពេញ ៖​ គណបក្សនយោបាយចំនួន ៤ នឹងចូលរួមប្រកួតប្រជែងការបោះឆ្នោតលើកទី១ ដើម្បីជ្រើសរើសក្រុមប្រឹក្សាក្រុងបូកគោ ខេត្តកំពត។ នេះបើតាមប្រកាសព័ត៌មានរបស់គណៈកម្មាធិការរៀបចំការបោះឆ្នោត នៅថ្ងៃទី១២ ខែឧសភា ឆ្នាំ២០២១នេះ។

អ្នកនាំពាក្យគណៈកម្មាធិការរៀបចំការបោះឆ្នោតលោក ឌឹម សុវណ្ណារុំ បានឱ្យដឹងទៀតថា នៅថ្ងៃនេះ គណៈកម្មការរៀបចំការបោះឆ្នោតខេត្តកំពត បានសម្រេចទទួលស្គាល់ជាផ្លូវការនូវការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះរបស់គណបក្សហ៊្វុនស៊ិនប៉ិច។

សម្រាប់ការបោះឆ្នោតលើកទី១ ដើម្បីជ្រើសរើសក្រុមប្រឹក្សាក្រុងបូកគោនៃខេត្តកំពត គណបក្សនយោបាយ ចំនួន ៤ នឹងចូលរួមប្រកួតប្រជែងរួមមាន គណបក្សគណបក្សប្រជាជនកម្ពុជា, គណបក្សសញ្ជាតិកម្ពុជា, គណបក្សយុវជនកម្ពុជា, គណបក្សហ៊្វុនស៊ិនប៉ិច។

លោក ឌឹម សុវណ្ណារុំ បន្ទាប់ពីសម្រេចទទួលស្គាល់ជាផ្លូវការនូវការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ គណៈកម្មការរៀបចំការបោះឆ្នោតខេត្ត នឹងរៀបចំការចាប់ឆ្នោតកំណត់លំដាប់លេខរៀងគណបក្សនយោបាយនៅលើសន្លឹកឆ្នោត ដើម្បីរៀបចំការបោះពុម្ពសន្លឹកឆ្នោតសម្រាប់ការបោះឆ្នោតជ្រើសរើសក្រុមប្រឹក្សាក្រុងបូកគោ ដែលនឹងប្រព្រឹត្តនៅថ្ងៃ២៥ ខែកក្កដា ឆ្នាំ២០២១៕